إعـــــــلان

تقليص
لا يوجد إعلان حتى الآن.

جـــــــرح الــحـــبــيــب

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • جـــــــرح الــحـــبــيــب







    بسم الله الرحمن الرحيم




    قصيدة جرح الحبيب من اجمل القصائد التي كتبها الشاعر الاديب جابر الكاظمي وقرأها الملا باسم الكربلائي قبل عدة سنوات .. كلماتها تقطع القلب .. وهي محاورة تبين لسان حال مولانا الامام السجّاد عليه السلام و احد صحابته الكرام ابو حمزة الثمالي :






    شلون اصبر على الآه .. و اترك نحيبي
    بيدي دفنت بالـﮕـاع .. جثة حبيبي
    لتظن يطيب .. جرح الحبيب .. و أترك نحيبي

    *****


    تعنّى يم علي السجاد .. أبو حمزة الثمالي اليوم
    يـﮕله سيدي الوادم .. بِدَت تحـﭽـي و عليك تلوم
    شكثر تنحب يبو الباقر .. يـﮕولون النحب مذموم
    يريدونك تكف دمعك .. تعيش بلا كدر و هموم

    و عن دمعتك يـﮕلون .. لمن تسحها
    هالدمعة للأموات .. تلـﭽم جرحها

    وخايف تصيب .. جرح الحبيب
    لتظن يطيب .. جرح الحبيب .. و اترك نحيبي

    ***********

    يجاوب حُجّة الباري .. و يصب دمع المحاجر دم
    يـﮕله يا أبو حمزة .. الوادم حـﮕها ما تعلم
    أنا القابض على الجمرة .. و يظللني سحاب الهم
    أطَشر بالصبر حزني .. و ردود الحزن يلتم

    و الوَجرت بحشاي .. نار المصيبة
    شحال اليصد و يشوف .. مصرع حبيبه

    يسعر لهيب .. جرح الحبيب
    لتظن يطيب .. جرح الحبيب .. و اترك نحيبي

    ***********


    يبو الحمزة البعض يفـﮕد .. عزيزه يظل عليه ينوح
    و يظل طول الوكت ينحب .. و لا يملك زمام الروح
    و هذا آنة الشِفت أهلي .. ضحايا بين ايديه تروح
    بين الـﮕطعو ﭼفوفه .. و بين اللي وﮔـع مذبوح

    حـﮕـّه اليريد يلوم .. و يبدي الملامة
    ماحاضر و لا شاف .. جثّة إمامه

    دامي و عجيب .. جرح الحبيب
    لتظن يطيب .. جرح الحبيب .. و اترك نحيبي

    ***********


    يلوموني يبو حمزة .. و لا عل ينفجع معتب
    فَرِد يوسف فـﮕد يعـﮕوب .. و ظل طول العمر ينحب
    و أنا شـﭽم يوسف ﮔـبالي .. أشوفه على الثرى امترَب
    رجع يوسف و أنا الما عاد .. حبيبي و بالدما تخضب

    يوسف عَدِل ماطاح .. جسمه و تعفّـر
    و ﮔـبالي جسم حسين .. طاح و توذر

    خلف نحيب .. جرح الحبيب
    لتظن يطيب .. جرح الحبيب .. و اترك نحيبي

    ***********

    يبو حمزة العتب مذموم .. على اللي فـﮕد ضي عيناه
    يلوموني البعض حـﮕهم .. محد شايف الشفناه
    ماشافوا طفل ضامي .. عوض ما تطفى نار حشاه
    تصيبه بمنحره النبلة .. و يتروى بنجيع دماه

    و لا شاهدوا عرّيس .. و موذرينه
    و تتحنى من دماه .. راحة يمينه

    بالدم خضيب .. جرح الحبيب
    لتظن يطيب .. جرح الحبيب .. و اترك نحيبي

    ***********

    يبو حمزة الزلم تطلع .. تقاتل تعرض المنحر
    لـﭽن شنهو الجعل هالـﮕوم .. تشن غارتها عالخِدَّر
    عـﮕب ذبح الزِلِم بالطف .. علينا صالت العسكر
    الأرامل و اليتامى بخوف .. هَجَّت و الخيم تسعر

    مرفوعة ليش الروس .. فوﮒ العواسل
    ليش بيُسُر للشام .. تمشي الأرامل

    و اللي يجيب .. جرح الحبيب
    لتظن يطيب .. جرح الحبيب .. و اترك نحيبي


    وهذا رابط القصيدة لمن يحب سماعها بصوت الملا باسم الكربلائي












    اشلون اصبر - باسم الكربلائي
    التعديل الأخير تم بواسطة عطر الكفيل; الساعة 17-12-2011, 11:42 PM.
    اللهم صل على محمد وآل محمد وعجل فرجهم

  • #2
    السلام عليكم ورحمة الله تعالى وبركاته
    الغالية عطر الكفيل بارك الله فيك واجرك على الامام الحسين عليه السلام
    موفقين
    اسألكم الدعاء
    اللهم صل على محمد وآل محمد الطيبين الطاهرين
    sigpic​

    تعليق

    يعمل...
    X