إعـــــــلان

تقليص
لا يوجد إعلان حتى الآن.

أسمك ياعلي

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • أسمك ياعلي

    أسمك يا علي رب الجلاله أختاره
    وجميع أحروف أسمك ترتفع قمه


    حرف العين عادل ما يميلك راي
    وعدوك ما يخافك ظنته أتظلمه


    وحرف اللام لين مو سبُع ع الناس
    خيمه ع الرعيه وبيك ......ملتمه


    وياءك يا علي ينبوع للأحكام
    خطيت أبكتبها منهج الحكمه


    علي ثاية فخر تتوسط التاريخ
    وتاريخك شرف محد وصل يمه


    ولا أحسبك إمام أمن العرش معصوم
    أنت أبسر وجودك تنتج العصمه

    ***


    الكعبه شالته وبت الأسد حملت
    وطلكَن فرد طلكَه ومن علي الهمه


    صاحن يا علي بسم العلي أتنخاك
    وسهلها الولادة أبنطقة الكلمه


    لسان النبي يرضع والنبي أمربيه
    ومحمد ربّه خصه الكل فضل نسمه


    للكعبه حماها وللركن ثبّت
    وزمزم بيها طيب ومن علي أتشمه


    أبو الكعبه علي ولا تسمع اليغتاض
    ونغيضه أكثر الكعبه الحيدره أمه


    كَبل جبريل حيدر يحفظ القرآن
    وللترتيل حيدر منهجه أيعلمه


    علي اليعرج سماء الله في كل حين
    قرأنه الوسيلة وما تعب جدمه


    أرتقى جتف النبي وأتعله ع الأملاك
    وتركعله أبخشوع وتسجد العلمه


    بيه خصله علي شاطرها للصوبين
    يقسمها عدل ما يعرف الوهمه


    جنين أبطن أمه وشطر بيت الله
    كرامة الحيدره طابوكَها أتهدمه


    وشي رب عبدته وخالق نزل للكَاع
    وشي كافر تعده وتشتمه أتذمه





    علي اليخذف يخاف ويرعد أمن الله
    وصناديد الزلم تخذف من ذكر أسمه


    يكبر للحرب تتراجف الصوبين
    ويرجف من فقير ويكرمه اللكَمه


    علي الأنزع بطين وربعه من ينقاس
    وأفعاله جبل والمابصر...... أعمه


    خبز أشعير أكله وقوته ﭽف الله
    وباب الحصن خيبر يسرته أتزمه


    يمينه ذو الفقار ويسره درعه الباب
    ويحسم للنزال وضربته الحسمه


    لا فر من حرب لا يتبع اللي فار
    واليثبت السيفه عورته أتسلمه


    جبريل العلي أذن لا فتى إياه
    ولا سيف الفقار الغيرك أتسمه



    ***
    أبحق حيدر علي آيات بالقرآن
    البراءه الواقعه التطهير وبعمه


    كفو الزهراء والزهره كفء حيدر
    ومواريث النبوة تنجب اليمه


    أمير المؤمنين وملك حب الناس
    وصراط الله علي بولايته القسمه


    بيت المال بيده ولا ملكله بيت
    وجديد الفقره لبس مو سمل هدمه


    ردتله الشمس كل شيعته أيزعمون
    وآنه أول موالي أيخالفه أبزعمه


    ما ردها علي أبنور العلي ردت
    سطع نوره وعلاها وصارت أبعتمه


    وبعد سمعت أذانه وفزت أمن النوم
    ما أدت فرضها الوكته متوهمه


    توضت بالفرات وخجله تتعذر
    ما صلت قضاء وخلفه مأتمه


    ***
    علي أول خساره الكل فقير أيعيش
    وعلي أول نصر والحاقد أيظمه


    علي المظلوم الأول عزه للمظلوم
    حيدر منظلم ظلموها للأمه


    أبجريرة حيدره تهموا أبوه كافر
    وأبو طالب رسالي ومؤمن العظمه


    علي وجعفر عقيل وطالب أيحرسون
    وأبو طالب كفيله ومو فقط عمه


    ولو نفرض جدل حيدر أبن سفيان
    نسبوله النبوه وزعمه يحترمه


    يسبوه ع المنابر رادوا أيدثروه
    وتكابر بالشموخ ويعله بالشتمه


    علي طلك الدنيه الرادته أيبسم
    طلكها أبثلاثه وفوكهن بسمه


    علي خادم شره يكَضيله شغل البيت
    صبح سيد الخادم حيدر أيخدمه


    صريفه ما ملكها ولا ترك دينار
    وذهب كَبته ضياء أينوّر النجمه


    أبو الكل اليتامى وللأرامل بيت
    اليتامه من رحل حس أبعظم يتمه


    علي ذكرك عباده وعترتك تسبيح
    وفخرك من محمد كاشف الغمه


    شسع نعلك علي شرّف كراسي وتوج
    وعبّاد الكراسي أتاجر أبدمه


    رافضها الزعامه وبايعوه مجبور
    خليفه والخلافه لا ذت أبحلمه



    لا نثريه عنده أبكل شهر مليار
    يمنحها اليحبه اليكرها أيحرمه


    لا صحوات شكل لا فرق أسناد
    ولا يرشي الشيوخ أبحملته أتلزمه


    يوميه طبك يوميه طف وموت
    يوميه لطم ودمانه متهمه


    مشو فوك الجثث وأجتافي معبر صار
    وصح بينه المثل من رجلك الحمه


    ما همهم شعب كل همهم الدولار
    متحزم حرام أيجمعه ويلمه


    هدموا للوطن يبنون للأحزاب
    وذبحوا للشعب بسيوف منسمه


    هدر فرعون من دم الشعب آلاف
    وفرعون الجديد أبلكمته أيعدمه


    لحايه من جذب وإيد المحابس زور
    ويسولفلي أبعلي وبسيرته وحكمه


    أدركنه يا علي الخاطر يتيم الضاع
    ليالينه أبسواد أنهارنه الظلمه
    *****
    آنِي آرَيدُ آمَنْا َيَا آبَنْ فَاطِمَةَ ... مُسْتمَسِگـاً بِيَدَي مَنْ طارَقِِ آلزَِمَنِ ِ
يعمل...
X